Skip to content. Skip to navigation.

Te Papahewa

He aha rawa?

Ko tēnei mea te papahewa tētahi kāhui mate nō te whatu, e kikī rawa ai te whatu, e nui ai te kahanga, ko te hua he tūkinotanga i te ioio whatu.

Ko te momo papahewa e kitea nuitia ana ko te papahewa koki tuwhera. I te nuinga o te wā, ko te wāhanga o mua i te whatu, e kiia nei ko te pakohu kamo o mua, he kī tonu i te wai e kiia nei ko te wai kamo. He mea whakaputa mai tēnei wai e te wāhi nei ko te kāhui pūtau, arā, te ‘ciliary body’ o te whatu, ko te wāhi whāngai tēnei i te wāhi o roto i te whatu, i mua i te pipītanga atu mā ngā kōawaawa whakamimiti o taua whatu. I te pānga o te mate papahewa nei, ka pāpuni pea ngā kōawaawa tuku ki waho i te takanga o te wā, ko te hua, e kore te wai kamo e āhei te mimiti ki waho.

Mā konei ka kikī rawa te whatu, kīa ai tēnei he kahanga o roto i te whatu. Me pēnei pea te whakaahua, ānō he pukuhau pea te whatu o te tangata, arā, te purūnu! Me ka kī rawa te pukuhau ki te hau, ki te wai rānei, ka pakaru, engari anō te whatu, he kaha rawa, e kore e pakō. Ko te hua kē, ka pupuhi ko te whatu, ka kaha rawa te pēhi i te iaia whatu, e kawe nei i ngā mōhiotanga i te whatu ki ngā roro. Mā tēnei kahanga e āki nei i ngā pitopito moroiti i te iaia whatu, e matemate ai ngā iaia, e ngaro rawa ai te taonga nei te kite a ngā whatu.

Ko te momo papahewa kāre e kitea nuitia ana ko te papahewa koki kati, te papahewa taimaha rānei. Ko tēnei mate, kua kūiti rawa te koki whakamimiti, kua pāpuni rawa, pēnei i te puru parahanga i te peihana wai!

Back to menu

He aha ngā tohu?

Kiia ai tēnei mea te papahewa te ‘kaitāhae i te kite’ ā, he tika tonu hoki. Ko te nuinga o te hunga pāngia ai e te papahewa koki tuwhera, kāore he tohu o te mate, kia ngaro rā anō tētahi wāhi nui o te kaha o ngā whatu ki te kite.

Back to menu

He aha te pūtake o te mate papahewa?

Ko tēnei mea te papahewa, he mate tuku iho, nō reira nō reira mehemea kua pāngia tētahi o tō whānau, he mea nui rawa kia auau te haere kia āta tirohia ō whatu.

Hei te kaumātuatanga atu hoki te nunuitanga atu o te pānga o te mate papahewa. Mehemea i roto anō tēnei mate i tōu whānau, ka nui ake te pānga.

Back to menu

Ka taea te mahi e te tākuta?

Ka taea te papahewa te mahi ki te rongoā, mā te turuturu rongoā, mā te kai pire, ēnei mea katoa hei whakaheke i te kahanga i roto i te whatu, kia pai ai te mahi whakamimiti a te whatu.

I ētahi wā, tīpokaina ai te whatu, i te taha o te kai rongoā, hei kaupare atu rānei i te mahi tīpoka, hei whakawhānui i te koki whakamimiti, e āhei ai te wai tinana te pipī atu, e pai ai hoki te whakamimiti a te whatu.

Ko te ngaro o te kite i te papahewea, e kore e taea te whakaora mai, nā reira e mea nui te haere auau kia āta tirohia ngā whatu.

Back to menu

Me pēhea e kauparea ai tēnei mate te papahewa kia kore ai e ngaro te kite a ōku whatu?

Kia auau te tirohanga i ngā whatu mehemea:

  • kei runga atu ō tau i te 40
  • i roto anō tēnei mate i tōu whānau
  • kua pāngia koe e te mate huka – mehemea he mate huka tō te tangata, ka pūrua te pāpātanga o te papahewa, tēnā i te pāpātanga ki te hunga kāore he mate huka.


Back to menu

Me haere au ki whea mō ētahi āwhina, mō ētahi atu kōrero rānei?

Ka taea te tirotiro ki ētahi atu kōrero mō te papahewa i ēnei tukutuku:

www.nei.nih.gov/health/glaucoma/glaucoma_facts.htm
www.glaucoma.org

Ka taea te whakapā atu ki te Tūāpapa o te Hunga Kāpō o Aotearoa ( arā te Royal New Zealand Foundation of the Blind) i 0800 24 33 33




Back to menu